នៅសប្តាហ៍នេះ ខ្ញុំមានសេចក្តីរីករាយស្វាគមន៍ការវិលត្រឡប់មកម្តងទៀតនូវមិត្ត និងជាសហការីរបស់ខ្ញុំម្នាក់ គឺលោក Danny Russel ឧបការីរដ្ឋមន្រ្តីក្រសួងការបរទេសសហរដ្ឋអាមេរិកទទួលបន្ទុកកិច្ចការអាស៊ីខាងកើត និងប៉ាស៊ីហ្វិក (អ្នកគួរតាមដានការិយាល័យរបស់លោកតាម Twitter @USAsiaPacific)។ នេះមិនមែនជាទស្សនកិច្ចលើកទី១ របស់លោកមកកាន់ប្រទេសកម្ពុជានោះទេ។ កាលពី ៣ ឆ្នាំមុន លោកបានធ្វើដំណើរមកកម្ពុជា ជាមួយលោកប្រធានាធិបតី Obama ដើម្បីចូលរួមក្នុងកិច្ចប្រជុំ ក្នុងអំឡុងពេលដែលកម្ពុជាធ្វើជាប្រធានអាស៊ាន ក្នុងឆ្នាំ២០១២។ ជាផ្នែកមួយនៃការបង្វែរការយកចិត្តទុកដាក់របស់លោកប្រធានាធិបតី Obama មកតំបន់អាស៊ីប៉ាស៊ីហ្វិក ទស្សនកិច្ចរបស់លោក Russel បញ្ជាក់ពីការប្តេជ្ញាចិត្តរបស់សហរដ្ឋអាមេរិក ចំពោះការពង្រឹងទំនាក់ទំនងទ្វេភាគី ដ៏សំខាន់របស់យើងជាមួយប្រទេសកម្ពុជា ព្រមទាំងចំពោះការបង្កើនកិច្ចសហប្រតិបត្តិការជាមួយប្រទេសអាស៊ានទាំងអស់។
លោក Danny Russel ឧបការីរដ្ឋមន្រ្តីក្រសួងការបរទេសសហរដ្ឋអាមេរិកទទួលបន្ទុកកិច្ចការអាស៊ីខាងកើត និងប៉ាស៊ីហ្វិក (រូបស្តាំ) ចាប់ដៃជាមួយលោក អ៊ុច បូរិទ្ធ រដ្ឋលេខាធិការក្រសួងការបរទេសកម្ពុជា នៅភ្នំពេញ (រូបថតរបស់ហេង ស៊ីនិត កាសែត AP)។
នៅក្នុងអំឡុងទស្សនកិច្ចរបស់លោក លោកឧបការី Russel បានជួបជាមួយតំណាងរាជរដ្ឋាភិបាល គណបក្សនយោបាយ សង្គមស៊ីវិល យុវជន អ្នកសារព័ត៌មាន និងក្រុមបុគ្គលិកទូតរបស់ខ្ញុំ។ ការជួបដំបូងរបស់លោកគឺជាមួយរដ្ឋមន្រ្តីការបរទេសស្តីទី អ៊ុច បូរិទ្ធ ដើម្បីបន្តការប្រាស្រ័យរបស់យើងជាមួយរាជរដ្ឋាភិបាលកម្ពុជា។ មេដឹកនាំទាំងពីរបានពិភាក្សាគ្នាពីឱកាសសំរាប់ជំរុញការទាក់ទងទ្វេភាគី និងផ្លាស់ប្តូរទស្សនៈលើបញ្ហាមួយចំនួនក្នុងតំបន់។ លោកឧបការីរដ្ឋមន្រ្តីបានបញ្ជាក់ច្បាស់ថា សហរដ្ឋអាមេរិកគាំទ្រដំណើរជឿនលឿនទៅមុខក្នុងកំណែទំរង់នយោបាយ ដើម្បីពង្រឹងស្ថាប័ននៅកម្ពុជា។ លោកទាំងពីរក៏បាននិយាយផងដែរពីវិធីដើម្បីបង្កើតអោយមានការងារធ្វើ និងពង្រីកពាណិជ្ជកម្ម និងការវិនិយោគ សំរាប់ប្រទេសទាំងពីរ។
លោក Danny Russel ឧបការីរដ្ឋមន្រ្តីក្រសួងការបរទេសសហរដ្ឋអាមេរិកទទួលបន្ទុកកិច្ចការអាស៊ីខាងកើត និងប៉ាស៊ីហ្វិក ថ្លែងពីការបង្វែរការយកចិត្តទុកដាក់របស់សហរដ្ឋអាមេរិកមកតំបន់អាស៊ីប៉ាស៊ីហ្វិក នៅក្នុងកិច្ចពិភាក្សាមួយដែលរៀបចំដោយវិទ្យាស្ថានកម្ពុជាដើម្បីកិច្ចសហប្រតិបត្តិការ និងសន្តិភាព។
បន្ទាប់មក លោកឧបការីរដ្ឋមន្រ្តីបានថ្លែងទៅកាន់ទស្សនិកជន ដែលមានក្រុមមនុស្សចំរុះស្តីពីការបង្វែរការយកចិត្តទុកដាក់របស់សហរដ្ឋអាមេរិកមកតំបន់អាស៊ីប៉ាស៊ីហ្វិក នៅក្នុងកិច្ចសន្ទនាមួយដែលរៀបចំដោយវិទ្យាស្ថាន ដើម្បីកិច្ចសហប្រតិបត្តិការ និងសន្តិភាព (CICP) ។ ខ្ញុំសូមអរគុណ CICP មិនត្រឹមតែចំពោះការរៀបចំកិច្ចសន្ទនា តែប៉ុណ្ណោះទេ តែចំពោះការងាររបស់គេនៅក្នុងរយៈពេលជាង ២០ ឆ្នាំមកនេះ ដើម្បីជួយធ្វើអោយប្រជាជន និងរដ្ឋាភិបាលកម្ពុជាមានការយល់ដឹងពីបញ្ហានយោបាយ ដ៏មានសារៈសំខាន់។
លោកឧបការីរដ្ឋមន្ត្រីការបរទេសអាមេរិកចាប់ដៃជាមួយស្ថាបនិកនៃអង្គការលីកាដូ គឺ លោកស្រីពង្ស ជីវហ្កិច ក្នុងពេលប្រជុំជាមួយអង្គការសង្គមស៊ីវិលដែលធ្វើការនៅកម្ពុជា។
នៅក្នុងពេលជួបជាមួយតំណាងនៃសង្គមស៊ីវិល លោកឧបការីរដ្ឋមន្រ្តីការបរទេសអាមេរិក Russel បានជ្រាបពីការងាររបស់អង្គការទាំងនេះនៅក្នុងការជួយក្នុងការខិតខំធ្វើកំណែទំរង់នៅកម្ពុជា។ នៅក្នុងប្លក់លើកមុន ខ្ញុំបានបញ្ជាក់ពីមេដឹកនាំសង្គមស៊ីវិលសំខាន់ៗខ្លះ ដែលកំពុងធ្វើការរួមចំណែកយ៉ាងសំខាន់។ ខ្ញុំជឿជាក់ថា សង្គមស៊ីវិលមានតួនាទីយ៉ាងសំខាន់ក្នុងការដោះស្រាយបញ្ហាប្រឈមនៅកម្ពុជា។
លោកឧបការីរដ្ឋមន្រ្តីការបរទេសអាមេរិក Russel ឆ្លើយសំណួររបស់អ្នកសារព័ត៌មាន នៅក្នុងកិច្ចពិភាក្សាតុមូល ជាមួយអ្នកសារព័ត៌មាន នៅក្នុងស្ថានទូតអាមេរិក។
ក្រោយមក នៅរសៀលនោះ លោកឧបការីរដ្ឋមន្រ្តីការបរទេសអាមេរិក Russel បានចូលរួមនៅក្នុងកិច្ចពិភាក្សាយ៉ាងផលផុសជាមួយសមាជិកនៃកម្មវិធីគំនិតផ្តួចផ្តើមស្តីពីមេដឹកនាំយុវជននៅអាស៊ីអាគ្នេយ៍ (YSEALI) របស់លោកប្រធានាធិបតី Obama ដែលត្រូវបានអញ្ជើញអោយមកចូលរួមក្នុងស្ថានទូត។ លោកបានស្តាប់ពី ការសង្ឃឹម និងការចង់បានរបស់ពួកគេសំរាប់ប្រទេសកម្ពុជា ហើយបានឆ្លើយសំណួររបស់គេស្តីពីបញ្ហា ដែលគេមានការចាប់អារម្មណ៍បំផុត។ លោកបានមានប្រសាសន៍ថា “វិធីមួយក្នុងចំណោមវិធីដែលយើងអាចជួយយុវជនកម្ពុជា គឺតាមរយៈកម្មវិធី YSEALI”។ ខ្ញុំយល់ស្របជាមួយលោកទាំងស្រុង ហើយខ្ញុំសង្ឃឹមថា នឹងមានយុវជនកម្ពុជាជាច្រើនទៀត នឹងចូលរួមក្នុងក្រុមដ៏សកម្ម និងដែលមានសមាជិកកាន់តែច្រើនឡើងនេះ។ ក្រោយមក លោកបានប្រាប់ខ្ញុំថា កម្មវិធីពិភាក្សាជាមួយសមាជិកកម្មវិធី YSEALI គឺជាកម្មវិធីដែលលោកមានការពេញចិត្តជាងគេ នៅថ្ងៃនោះ។
រួមជាមួយអនុប្រធានទូត គឺលោកស្រី Julie Chung (រូបកណ្តាល) ខ្ញុំបានចូលរួមជាមួយ លោកឧបការីរដ្ឋមន្រ្តីការបរទេសអាមេរិក Russel នៅក្នុងការពិភាក្សាដ៏គួរអោយចាប់អារម្មណ៍។
ទោះបីជាលោកមកកម្ពុជាក្នុងរយៈពេលខ្លីក្តី តែទស្សនកិច្ចរបស់លោកឧបការីរដ្ឋមន្រ្តីការបរទេសអាមេរិក Russel បង្ហាញអោយឃើញការប្តេជ្ញាចិត្តរបស់សហរដ្ឋអាមេរិកក្នុងការធ្វើជាដៃគូជាមួយគ្រប់ភាគីទាំងអស់ ដែលមានរដ្ឋាភិបាល គណបក្សនយោបាយ សង្គមស៊ីវិល និងយុវជន ដើម្បីនាំមកនូវកំនើននៃឱកាស វិបុលភាព និងលទ្ធិប្រជាធិបតេយ្យ ដល់ប្រជាជនកម្ពុជា។ ខ្ញុំសូមអរគុណដល់អ្នកទាំងអស់ដែលបានធ្វើអោយទស្សនកិច្ចនេះមានជោគជ័យ ហើយដែលបានជួយលោកឧបការីរដ្ឋមន្រ្តីការបរទេសអាមេរិក Russel អោយមានអារម្មណ៍កក់ក្តៅនៅកម្ពុជា!
លោកឧបការីរដ្ឋមន្រ្តីការបរទេសអាមេរិក Russel និងសមាជិកខ្លះនៃកម្មវិធី YSEALI នៅកម្ពុជា។
